مشهد من رواية "خيانة ناعمة"

تخرج هند من لقائها مع صديقتها وهي تبكي وتجلس تكتب مذكراتها في بيتها ... تفكر في اسم لتلك المذكرات

-          يا ترى ايه العنوان المناسب اللي ممكن اكتب تحته مذكراتي؟

-          ايه الاسم اللي يعبر عن التجربة اللي تعرضت لها

-          الخيانة الكبرى؟

-          اظن الخيانة معناها أنه عرف علي ست تانية ودي خيانة فعلا بس اهون بكتير من اللي حصل لي

-          ايه الاسم اللي يعبر عن سنين عمر ضاعت من شبابي وانا بحب انسان عمره ما حبني ... انسان كان عامل زي السرطان اول ما يبدأ متحسش بيه ولما يتمكن يعصرك من الالم

-          انسان طول عمره بيخدعني من اول يوم فكر فيه يعرفني لحد اخر لحظة لما طلقني مضطر وهو في غرفة الاعدام

-          انسان كل ما تحبه ياذيك اكتر ولو في يوم فادك فمن باب انه مفيش ضرر له او يمكن انه بيحاول يرتاح من حاجة خانقاه ... يعني زي ما تقابل واحد فقير وجيبك مليان فلوس فضة منفوخ على الفاضي فتتصدق عليه مش عشان الكرم والصدقة لكن عشان تفضي جيبك وترتاح منه الشخشخة وانت ماشي

-          كان بياذيني وانا فاكراه خائف عليا ... كان بيضرني وانا اقول بيدور على مصلحتي ... كان بيكرهني وانا من خيبتي فاكراه بيحبني ... اقدر يوضع خطة ناعمة ليسيطر على عقلي ومشاعري

-          وعشان كده انا لازم اخلص منه بنفس طريقته ... طريقة الخطة الناعمة اللي عملتها له ... والعين بالعين

-          اكيد اللي عمله ده نوع من انواع الخيانة بس اخبث انواع الخيانة .... خيانة ناعمة